காத்திருப்பின் நீளத்தில்…

நீயின்றி வெறுமையால்
நிரம்பும் இருண்மை
சுவற்றில் ஆங்காங்கே நூலாம்படை
சுற்றிலும் விரிந்த நூல்களின் படை
ஊடைக்குள் பாவாய் அவற்றோடு
பின்னிக் கிடக்கிறேன்
வெளிக்காற்றை விடுத்து
என் உயிர்க்காற்றில் உலவுகிறேன்
வயிற்றுணவை மறந்து
படித்துப் படித்து
விழிகளால் உணர்வை
நிறைத்துக் கொள்கிறேன்
உலரும் நாவினை
நனைத்து நனைத்துத்
தீர்ந்து போனது தேநீர்
தீராத உன் நினைவுகளோடு…
இப்படியாய்
உனக்கான என் காத்திருப்பின் நீளத்தில்
சிறுத்துப் போகிறது சீனப் பெருஞ்சுவர்

ச.க.இரமேசு எழில்